Latin · ~7 min
Lines 1.290-1.333
May, Liber Sextus 1.290-333
Not analysed yet
Nec solum ante tubas, sed post haec proelia, tristis
Caesar erat; quanti victoria constitit illa,
Et quam moesta siet civili gloria bello,
Sero animum subiit. Miserae nunc vulnera Romae,
Nunc sua, victorisque nefas crudele, recenset,
Invidamque simul; victricem paene coactus
Fortunam damnare suam; quae clade triumphum
Obruit, et tanto mersisset sanguine lauros.
Talia dum moesto volvebat pectore Caesar,
Pompeii caput abscisum Cenonius affert.
Imgemit, et tantae lacrymis agnoscit obortis
Fata domûs; subiit magni genitoris imago,
Atque Aegyptiaco miserandum in litore funus.
Quaerenti fatum juvenis Cenonius infit:
"Cum modo Pompeius, Mundae funesta per arva,
"Tot stragis cumulos, tot corpora caesa suorum,
"Infelix vidit, nec jam reparabile damnum;
"Vectus equo celeri, Carteiae ad litora fugit;
"Ut, portum nactus notum, dare carbasa ventis
"Posset; at insidias veritus, nostrosque sequentes,
"Litora deseruit rursus, silvamque propinquam,
"Consilii incertus, petiit. Nos, terga secuti,
"Instamus, silvamque oculis scrutamur opacam;
"Quaerentesque diu frustra, sub tegmine fagi
"Umbrosae tandem defessum, et vulnere claudum,
"Pompeium adspicimus solum, (pro tristia sortis
"Humanae specula, et pompae documenta caducae!)
"Pompeium illum, (inquam) qui tectum, o maxime Caesar,
"Tot modo stipatus legionibus, et comitatus
"Gentibus innumeris, tam longo tempore fatis
"Pugnavit dubiis, jam cinctum milite nullo
"Vidimus. Ut tradat se, hortamur: at ille minaci
"Intrepidus vultu, 'Nunquam me Caesaris, inquit,
"Captivum, victum quamvis, Fortuna videbit.
"Abscisum videat caput; et, cervice revulsâ,
"Haeredem agnoscat Magni: nec dedecus illud,
"Quod fatum genitoris erat, mihi Roma putabit.
"Non tam vile tamen caput hoc, certamine nullo,
"Ut vobis tradatur, erit. Dum tela supersunt,
"Non gratis moriar.' Tum pugnam ingressus iniquam,
"In mediosque ruens, sine spe, sine viribus, omnes
"Nos pariter, solâ adjutus virtute, lacessit.
"Nec vitam, quam tanto animo projecerat ipse,
"Servandi nobis conceditur ulla potestas.