# Ad Lucernarium 1

Miscellanea Carminum, Ad Lucernarium, 1. Latin.

Canonical: https://interlinea.aeterna-institute.org/library/latin/miscellanea-carminum/ad-lucernarium/1

Deus qui certis legibus
Noctem discernis ac diem,
Ut fessa curis corpora
Somnus relaxet otio,
Te noctis inter horridae
Tempus precamur, ut, sopor
Mentem dum fessam detinet,
Fidei lux illuminet.
Hostis ne fallax incitet
Lascivis curis, gaudiis,
Secreta noctis advocans
Blandos in aestus corporis.
Subrepat nullus sensui
Horror timoris anxii
Illudat mentem nec vagam
Fallax imago visuum.
Sed cum profundus vinxerit
Somnus curarum nescius,
Fides nequaquam dormiat,
Vigil te sensus somniet.

---

Miscellanea Carminum, Ad Lucernarium. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/lucernarium.html.