# Eugenius Vulgarius 1

Miscellanea Carminum, Eugenius Vulgarius, 1. Latin.

Canonical: https://interlinea.aeterna-institute.org/library/latin/miscellanea-carminum/eugenius-vulgarius/1

Heu quis prior ille piator
qui cusor in arte fabrina
variavit in igne figuras,
cudens gladii male formas?
Quis denique Martia primus
arcus volucresque sagittas
ignivit et edidit iras,
mortes stabilivit amaras?
Qui spicula cudit in usus,
conflavit in incude funus;
lamne tenuavit et ictus,
ventris vacuaret ut haustus.
Docuit quoque cuspide mortem
qui duxit in ordine martem;
amiserat et quia mentem
umbre tenuere tumentem.
Medieval Latin The Latin Library The Classics Homepage

---

Miscellanea Carminum, Eugenius Vulgarius. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/eugenius.html.