# Prata iam rident omnia 1

Miscellanea Carminum, Prata iam rident omnia, 1. Latin.

Canonical: https://interlinea.aeterna-institute.org/library/latin/miscellanea-carminum/prata-iam-rident-omnia/1

Prata iam rident omnia,
dulce est flores carpere,
sed nox donat his somnia,
qui semper vellent ludere:
ve ve miser, quid faciam?
Venus, mihi subvenias,
tuam iam colo gratiam.
Plangit cor meum misere,
quia caret solatio.
si velles hoc cognoscere,
bene posses, ut sentio.
o tu virgo pulcherrima,
si non audis me miserum,
mihi mors est asperrima.
Tempus accedit floridum,
heimps discedit temere,
omne quod fuit aridum,
germen suum vult gignere;
quamdiu modo vixeris,
semper letare, iuvenis,
quia nescis cum deperis.
Dulcis appares omnibus,
sed es mihi dulcissima,
tu pre cunctis virginibus
incedis ut castissima,
o tu, mitis considera,
nam per te gemitus
passus sum et suspiria. Medieval Latin The Latin Library The Classics Homepage

---

Miscellanea Carminum, Prata iam rident omnia. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/prataiam.html.