# Rumor letalis 1

Miscellanea Carminum, Rumor letalis, 1. Latin.

Canonical: https://interlinea.aeterna-institute.org/library/latin/miscellanea-carminum/rumor-letalis/1

Invida fama
tibi novercatur;
cautius ama
ne comperiatur.
Quod agis, age tenebris;
procul a fame palpebris
letatur amor latebris
et dulcibus illecbris
cum murmure iocoso.
Nulla notavit
te turpis fabula
dum nos ligavit
amoris copula;
sed frigescente
nostra cupidine,
sordes repente
funebri crimine.
Fama letata
novis hymeneis,
irrevocata
ruit in plateis.
Patet lupanar omnium
pudoris in palatium,
nam virginale lilium
marcet a tactu vilium
commercio probroso.
Nunc plango florem
etatis tenere
nitidiorem
Veneris sidere --
tunc columbinam
mentis dulcedinem
nunc serpentinam
amaritudinem.
Verbo rogantes
removes hostili;
munera dantes
foves in cubili.
Illos abire precipis
a quibus nihil accipis;
cecos claudosque recipis,
viros illustres decipis
cum melle venenoso.
Medieval Latin The Latin Library The Classics Homepage

---

Miscellanea Carminum, Rumor letalis. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/rumor.html.