# Terra iam pandit gremium 1

Miscellanea Carminum, Terra iam pandit gremium, 1. Latin.

Canonical: https://interlinea.aeterna-institute.org/library/latin/miscellanea-carminum/terra-iam-pandit-gremium/1

Nunc ergo canunt iuvenes,
nunc cantum promunt volucres;
modo ferro durior
est, quem non mollit Venus,
et saxo frigidior,
qui non est igne plenus.
pellantur nubes animi,
dum aer est serenus.
Ecce, iam vernant omnia
fructu redivivo,
pulso per temperiem
iam frigore nocivo,
tellus feta sui partus
grande decus flores
gignit odoriferos
nec non multos colores.
Catonis visis talibus
inmuterentur mores.
Fronde nemus induitur,
iam canit philomena,
cum variis coloribus
iam prata sunt amena,
spatiari dulce est
per loca nemorosa,
dulcius est carpere
lilia cum rosa,
dulcissimum est ludere
cum virgine formosa.
Verum cum mentes talia
recensent oblectamina,
sentio quod anxia
fiunt mea precordia.
si friget in qua ardeo
nec mihi vult calere,
quid tunc cantus volucrum
mihi queunt valere,
cum tunc circum precordia
iam hyems est vere. Medieval Latin The Latin Library The Classics Homepage

---

Miscellanea Carminum, Terra iam pandit gremium. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/terraiam.html.