# Vestiunt silve tenera merorem 1

Miscellanea Carminum, Vestiunt silve tenera merorem, 1. Latin.

Canonical: https://interlinea.aeterna-institute.org/library/latin/miscellanea-carminum/vestiunt-silve-tenera-merorem/1

Vestiunt silve tenera merorem
virgulta, suis onerata pomis,
canunt de celsis sedibus palumbes
carmina cunctis.
Hic turtur gemit, resonat hic turdus,
pangit hic priscus merularum sonus;
passer nec tacens, arridens garritu
alte sub ulmis.
Hic leta canit philomela frondis
longas effundit sibilum per auras
sollempne, milvus tremulaque voce
aethera pulsat.
Ad astra volans aquila, in auris
alauda canit modulis resoluit
desursum vergit dissimili modo,
dum terram tangit.
Velox impulit rugitus hirundo,
clangit coturnix, gracula fringultit;
aves sic cuncte celebrant estivum
undique carmen.
Nulla inter aves similis est api,
que talem gerit tipum castitatis
nisi Maria, que Christum portavit alvo
inviolata.

---

Miscellanea Carminum, Vestiunt silve tenera merorem. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/vestiunt.html.