# De aucupio 2

Nemesianus, De aucupio, Poem 2. Latin.

Canonical: https://interlinea.aeterna-institute.org/library/latin/nemesianus/de-aucupio/2
JSON: https://interlinea.aeterna-institute.org/api/v1/library/latin/nemesianus/de-aucupio/2

Cum nemus omne suo uiridi spoliatur honore,
Fultus equi niueis siluas pete protinus altas
Exuuiis: praeda est facilis et amoena scolopax.
Corpore non Paphiis auibus maiore uidebis.
Illa sub aggeribus primis, qua profluit umor,
Pascitur, exiguos sectans obsonia uermes.
At non illa oculis, quibus est obtusior, etsi
Sint nimium grandes, sed acutis naribus instat:
Impresso in terram rostri mucrone, sequaces
Vermiculos trahit et uili dat praemia gulae.

---

Nemesianus, De aucupio. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/NEMES%7Caucu%7C001.
