# Optice 201

Newton, Optice, OPTICES. Latin.

Canonical: https://interlinea.aeterna-institute.org/library/latin/newton/optice/201
JSON: https://interlinea.aeterna-institute.org/api/v1/library/latin/newton/optice/201

Quo autem hanc materiam adhuc uberius explicemus; Fig finge Circulos concentricos AV & BX, repraesentare cujusvis Seriei colores rubeum ac violaceum, qui, una cum coloribus intermediis, unum quemvis horum Annulorum constituant. Jam quidem si hi circuli per Prisma inspiciantur; utique circulus violaceus BX, majori Refractione, transferetur longius e loco suo, quam rubeus AV; adeoque ad rubeum istum propius accedet illa in parte, quam versus Refractiones fiunt. Exempli gratia: Si circulus rubeus transferatur ad av, utique violaceus transferri poterit ad bx: adeo ut jam propius, quam ante, accedat ad rubeum in parte x: Sique rubeus transferatur longius ad a v; utique violaceus itidem proportione, tanto ulterius transferri poterit ad bX, ut coeat jam plane cum rubeo in X: Sique rubeus adhuc porro longius transferatur ad aT; utique violaceus itidem, tanto etiam adhuc ulterius transferri poterit ad βξ, ut jam plane praetervectus sit rubeum in ξ, coeat autem cum eo in e & f. Quod si hoc idem de aliis quoque Coloribus intermediis, aeque ac rubeo & violaceo; itemque de omnibus colorum istorum Seriebus, dictum similiter intelligatur: facile jam percipies quemadmodum Colores unius ejusdemque Ordinis sive Seriei, propinqui facti inter se ad xv & T ξ, & coeuntes plane ad XV & e & f, debeant constituere Arcus Circulorum satis quidem distinctos, maxime ad Xv vel ad e & f; ad xv autem, apparere separati; & ad XV Albitudinem mutua permixtione conficere; rursumque apparere separati ad T ξ; ordine autem contrario, quam quo ante apparuerant, & quam etiamnum apparent ultra e & f 6 & s.

---

Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://zenodo.org/records/15040256.
