Latin
Book 1, lines 1.603-1.618
Orientius, Saint, Commonitorium 1.603-618
Not analysed yet
Et cum flammiferis frigentia, mollia duris,
Siccis cum pugnent umida, lenta citis,
Omne per ignotas tacito moderamine causas
Vno consociat foedere pacis opus.
Sic, modo si paruis cupias componere magna,
Corporeum frenat pacis amor populum,
Vt sub terreno sociatus principe discat
Regi caelorum soluere uota simul.
Ergo mei similis peccator, me minor imo
(Omnes criminibus namque ego uinco meis)
Pacem placatus, pacem quoque laesus amato:
Pax in uisceribus, pax sit in ore tuo.
Pelle odium, contemne minas, depone tumorem,
Offensam teneant tempora nulla tuam,
Vt te sol blandae seruantem uincula pacis
Deserat abscedens, inueniat rediens.