# Epistulae 9.141-168

Ovid, Epistulae, Lines 9.141-9.168. Latin.

Canonical: https://interlinea.aeterna-institute.org/library/latin/ovid/epistulae/9.141

Semivir occubuit in lotifero Eueno
Nessus, et infecit sanguis equinus aquas.
Sed quid ego haec refero? scribenti nuntia venit
Fama, virum tunicae tabe perire meae.
Ei mihi! quid feci? quo me furor egit amantem?
Inpia quid dubitas Deianira mori?
An tuus in media coniunx lacerabitur Oeta,
Tu sceleris tanti causa superstes eris?
Siquid adhuc habeo facti, cur Herculis uxor
Credar, coniugii mors mea pignus erit!
Tu quoque cognosces in me, Meleagre, sororem!
Inpia quid dubitas Deianira mori?
Heu devota domus! solio sedet Agrios alto;
Oenea desertum nuda senecta premit.
Exulat ignotis Tydeus germanus in oris;
Alter fatali vivus in igne situs;
Exegit ferrum sua per praecordia mater.
Inpia quid dubitas Deianira mori?
Deprecor hoc unum per iura sacerrima lecti,
Ne videar fatis insidiata tuis.
Nessus, ut est avidum percussus harundine pectus,
'Hic,' dixit, 'vires sanguis amoris habet.'
Inlita Nesseo misi tibi texta veneno.
Inpia quid dubitas Deianira mori?
Iamque vale, seniorque pater germanaque Gorge,
Et patria et patriae frater adempte tuae,
Et tu lux oculis hodierna novissima nostris,
Virque — sed o possis! — et puer Hylle, vale!

---

Ovid, Epistulae, ed. Rudolf Ehwald. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0959/phi002/phi0959.phi002.perseus-lat2.xml.