# Ex Ponto 2.3.91-100

Ovid, Ex Ponto, Book 2, lines 2.3.91-2.3.100. Latin.

Canonical: https://interlinea.aeterna-institute.org/library/latin/ovid/ex-ponto/2.3.91

haec igitur referens et quod mea crimina primi
erroris venia posse latere vides,
respicis antiquum lassis in rebus amicum,
fomentisque iuvas vulnera nostra tuis.
pro quibus optandi si nobis copia fiat,
tam bene promerito commoda mille precer.
sed si sola mihi dentur tua vota, precabor
ut tibi sit salvo Caesare salva parens.
haec ego, cum faceres altaria pinguia ture,
te solitum memini prima rogare deos.

---

Ovid, Ex Ponto, ed. Arthur Leslie Wheeler. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0959/phi009/phi0959.phi009.perseus-lat2.xml.