# VI. Hypsipyle Iasoni 1.91-134

Ovid, VI. Hypsipyle Iasoni, Lines 1.91-1.134. Latin.

Canonical: https://interlinea.aeterna-institute.org/library/latin/ovid/vi-hypsipyle-iasoni/1.91

per tumulos errat passis discincta capillis
certaque de tepidis colligit ossa rogis.
devovet absentis simulacraque cerea figit
et miserum tenues in iecur urget acus.
et quae nescierim melius: male quaeritur herbis
moribus et forma conciliandus amor.
Hanc potes amplecti thalamoque relictus in uno
inpavidus somno nocte silente frui?
scilicet ut tauros, ita te iuga ferre coegit:
quaque feros angues, te quoque mulcet ope.
adde quod adscribi factis procerumque tuisque
se favet et titulo coniugis uxor obest.
atque aliquis Peliae de partibus acta venenis
inputat et populum qui sibi credat habet:
non haec Aesonides, sed Phasias Aeetine
aurea Phrixeae terga revellit ovis.
non probat Alcimede mater tua—consule matrem!—
non pater, a gelido cui venit axe nurus.
illa sibi a Tanai Scythiaeque paludibus udae
quaerat et a patria Phasidis usque virum.
Mobilis Aesonide vernaque incertior aura,
cur tua polliciti pondere verba carent?
vir meus hinc ieras, vir non meus inde redisti—
sim reducis coniunx, sicut euntis eram.
si te nobilitas generosaque nomina tangunt:
en ego Minoo nata Thoante feror.
Bacchus avus: Bacchi coniunx redimita corona
praeradiat stellis signa minora suis.
dos tibi Lemnos erit, terra ingeniosa colenti;
me quoque dotalis inter habere potes.
Nunc etiam peperi. gratare ambobus, Iason—
dulce mihi gravidae fecerat auctor onus.
felix in numero quoque sum prolemque gemellam
pignora Lucina bina favente dedi.
si quaeris, cui sint similes, cognosceris illis:
fallere non norunt, cetera patris habent;
legatos quos paene dedi pro matre ferendos;
sed tenuit coeptas saeva noverca vias.
Medeam timui—plus est Medea noverca—
Medeae faciunt ad scelus omne manus.
Spargere quae fratris potuit lacerata per agros
corpora, pignoribus parceret illa meis?
hanc, tamen o demens Colchisque ablate venenis,
diceris Hypsipyles praeposuisse toro?

---

Ovid, VI. Hypsipyle Iasoni. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/ovid/ovid.her6.shtml.