# Satires pr

Persius, Satires, pr. Latin.

Canonical: https://interlinea.aeterna-institute.org/library/latin/persius/satires/pr
JSON: https://interlinea.aeterna-institute.org/api/v1/library/latin/persius/satires/pr
CTS URN: urn:cts:latinLit:phi0969.phi001.perseus-lat2:pr

Nec fonte labra prolui caballino
nec in bicipiti somniasse Parnaso
memini, ut repente sic poeta prodirem.
Heliconidasque pallidamque Pirenen
illis remitto, quorum imagines lambunt
hederae sequaces: ipse semipaganus
ad sacra vatum carmen adfero nostrum.
quis expedivit psittaco suum chaere,
picamque docuit verba nostra conari?
magister artis ingenique largitor
venter, negatas artifex sequi voces;
quod si dolosi spes refulserit nummi,
corvos poetas et poetridas picas
cantare credas Pegaseium nectar.

---

Persius, Satires, ed. G. G. Ramsay. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0969/phi001/phi0969.phi001.perseus-lat2.xml.
