# Petrus de Ebulo Liber ad Honorem Augusti sive de Rebus Siculis 1.679-721

Petrus de Ebulo, Petrus de Ebulo Liber ad Honorem Augusti sive de Rebus Siculis, Lines 1.679-1.721. Latin.

Canonical: https://interlinea.aeterna-institute.org/library/latin/petrus-de-ebulo/petrus-de-ebulo-liber-ad-honorem-augusti-sive-de-rebus-siculis/1.679

Ex oriente deus, conserva Cesaris actus,
Ille tuus Raphael preparet eius iter.
Ex oriente deus, Romanum protege solem,
Ut repetat patriam sospite mente suam.
Ex oriente deus, custodi nuper euntem,
Quo tibi pro magno munere vota feram.
Ex oriente deus, dulcem comitare maritum,
Emolli duros, saxea colla doma.
Ex oriente deus, tumidos tere, perde superbos,
Coniugis angelicum fac redeuntis iter.
Ex oriente deus, qui regnas in tribus unus,
Redde virum famule, que perit absque viro.
Cui mare, cui tellus, cui celum vivit et ether,
Vir meus inter tot dona superstes eat.
Si pereo, per eum pereo, quia Cesare vivo
Triste nichil patiar, dum modo capta ferar."
Proditor interea Gisualdi venit Elias,
Exhonerans famulas sera podagra manus:
Sanguine non hominum didicit lenire dolorem
Nec sapit antidotum, seve Mathee, tuum.
Qui, videt ut dominam, quasi gallicus ore rotundo
Fatur, et in domina, glis satur, exta vomit:
"Heia, si qua potes, nostris virtutibus insta!
Eia, si qua potes bella movere, move !
Qui cupit omne, quod est, et parti cedere nescit,
Amittet totum.
Sic tibi, dum velles totum, quod volvitur evo,
Contigit, et regno pro breviore cadis.
Est opus, ut venias merito captiva Panormum;
Sic populus, sic rex: hic petit, ille iubet."
<Particula> XXIV.: Domine coacta descensio
At domine vultus, pallescere nescius unquam,
Inmodicum pallens, lumina crispat humo.
Nec mora pallor abit: proprii rediere colores.
Simplicibus ludunt lilia simpla rosis,
Ut tenuis quandoque diem denigrat amictus
Et subito, lapsa nube, diescit humus.
Pauca quidem loquitur: "Veniam, Tancrede, Panormum
Et veniam, veniam non aditura tuam."
Protinus obiecit pactum: "Gens annuat", inquit,
"Ut meus hinc salvo pectore miles eat."
Instanti populo placuit sententia talis,
Nec mens in tantis omnibus una fuit.

---

Petrus de Ebulo, PETRUS DE EBULO LIBER AD HONOREM AUGUSTI SIVE DE REBUS SICULIS. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/ebulo.html.