# Appendix Perottina 7

Phaedrus, Appendix Perottina, Poem 7. Latin.

Canonical: https://interlinea.aeterna-institute.org/library/latin/phaedrus/appendix-perottina/7
JSON: https://interlinea.aeterna-institute.org/api/v1/library/latin/phaedrus/appendix-perottina/7

Ixion quod uersari narratur rota,
Volubilem Fortunam iactari docet.
Aduersus altos Sisyphus montes agens
Saxum labore summo, quod de uertice
Sudore semper irrito reuoluitur,
Ostendit hominum sine fine <esse> miserias.
Quod stans in amne Tantalus medio sitit,
Auari describuntur, quos circumfluit
Vsus bonorum, sed nil possunt tangere.
Vrnis scelestae Danaides portant aquas,
Pertusa nec complere possunt dolia;
Immo luxuriae quicquid dederis perfluet.
Nouem porrectus Tityos est per iugera,
Tristi renatum suggerens poenae iecur;
Quo quis maiorem possidet terrae locum,
Hoc demonstratur cura grauiore adfici.
Consulto inuoluit ueritatem antiquitas
Vt sapiens intellegeret, erraret rudis.

---

Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/PHAEDR%7Cappe%7C001.
