Latin · ~1 min
Poem 1.9
Phaedrus, Fables 1.9
Not analysed yet
Sibi non cavere et aliis consilium dare
Stultum esse paucis ostendemus versibus.
Oppressum ab aquila, fletus edentem graves,
Leporem obiurgabat passer: Ubi pernicitas
Nota inquit illa est? Quid ita cessarunt pedes?
Dum loquitur, ipsum accipiter necopinum rapit
Questuque vano clamitantem interficit.
Lepus semianimus mortis in solacio:
Qui modo securus nostra irridebas mala,
Simili querela fata deploras tua.