# Fables 21

Phaedrus, Fables, Poem 21. Latin.

Canonical: https://interlinea.aeterna-institute.org/library/latin/phaedrus/fables/21
JSON: https://interlinea.aeterna-institute.org/api/v1/library/latin/phaedrus/fables/21
CTS URN: urn:cts:latinLit:phi0975.phi001.perseus-lat2:21

Quidam per agros devium carpens iter
Ave exaudivit et moratus paululum,
Adesse ut vidit neminem, cepit gradum.
Iterum salutat idem ex occulto sonus.
Voce hospitali confirmatus restitit,
Ut quisquis esset par officium reciperet.
Cum circumspectans errore haesisset diu
Et perdidisset tempus aliquot milium,
Ostendit sese corvus et supervolans
Ave usque ingessit. Tum se lusum intellegens:
At male tibi sit inquit ales pessime,
Qui festinantis sic detinuisti pedes.

---

Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml.
