# Fables 30

Phaedrus, Fables, Poem 30. Latin.

Canonical: https://interlinea.aeterna-institute.org/library/latin/phaedrus/fables/30
JSON: https://interlinea.aeterna-institute.org/api/v1/library/latin/phaedrus/fables/30
CTS URN: urn:cts:latinLit:phi0975.phi001.perseus-lat2:30

Avis quam dicunt terraneolam rustici,
In terra nidum quia componit scilicet,
Forte occucurrit improbae vulpeculae;
Qua visa, pennis altius se sustulit.
Salve inquit illa cur me fugisti, obsecro?
Quasi non abunde sit mihi in prato cibus,
Grilli, scarabaei, locustarum copia:
Nihil est quod metuas: ego te multum diligo
Propter quietos mores et vitam probam.
Respondit contra: Tu quidem bene praedicas;
In campo non sum, sed par sub divo tibi.
Quin sequere: salutem tibi non committo meam.

---

Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml.
