Latin · ~1 min
Poem 5.10
Phaedrus, Fables 5.10
Not analysed yet
Adversus omnes fortis veloces feras
Canis cum domino semper fecisset satis,
Languere coepit annis ingravantibus.
Aliquando obiectus hispidi pugnae suis
Arripuit aurem, sed cariosis dentibus
Praedam dimisit. Hic tunc venator dolens
Canem obiurgabat. Cui latrans contra senex:
Non te destituit animus, sed vires meae.
Quod fuimus laudas, si iam damnas quod sumus.
Hoc cur, Philete, scripserim, pulchre vides.