# Miles Gloriosus 2.3.335-353

Plautus, Miles Gloriosus, Act 2, lines 2.3.335-2.3.353. Latin.

Canonical: https://interlinea.aeterna-institute.org/library/latin/plautus/miles-gloriosus/2.3.335

vin iam faciam, ut stultividum … fateare?
Age face.
Neque te quicquam sapere corde neque oculis uti?
Volo.
Nempe tu istíc ais esse erilem concubinam?
Atque arguo
eam me vidisse osculantem hic intus cum alieno viro.
Scin tu nullum commeatum hínc esse a nobis?
Scio.
Neque solarium neque hortum, nisi per impluvium?
Scio.
Quid nunc? si ea domist, si facio, ut eam exire hinc videas domo,
dignun es verberibus multis?
Dignus.
Serva istas fores,
ne tibi clam se subterducat istinc atque huc transeat.
Consilium est ita facere.
Pede ego iam illam huc tibi sistam in viam. —
Agedum ergo face. vólo scire, utrum egon id quod vidi viderim
an illic faciat, quod facturum dicit, ut ea sit domi.
nam ego quidem meos oculos habeo nec rogo utendos foris.
sed hic illi subparasitatur semper, hic eae proxumust,
primus ad cibum vocatur, primo pulmentum datur;
nam illic noster est fortasse circiter triennium,
neque cuiquam quam illi in nostra meliust famulo familia.
sed ego hoc quod ago, id me agere oportet, hoc observare ostium.
sic obsistam. hac quidem pol certo verba mihi numquam dabunt.

---

Plautus, Miles Gloriosus, ed. Friedrich Leo. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0119/phi012/phi0119.phi012.perseus-lat2.xml.