Latin · ~3 min
Act 4
Plautus, Miles Gloriosus 4.9
Not analysed yet
Ne me moneatis, memini ego officium meum,
ego †nam conveniam illum, ubi ubi est gentium;
investigabo, óperae non parcam meae.
Me quaerit illic. ibo huic puero obviam.
Ehem, te quaero. salve, vir lepidissime,
cumulate commoditate, praeter ceteros
duo dí quem curant.
Qui duo?
Mars et Venus.
Facetum puerum.
Intro te ut eas obsecrat,
te volt, te quaerit, teque exspectans expetit.
amanti fer opem. quid stas? quin intro is?
Eo. —
Ipsus illic sese iam impedivit in plagas;
paratae insidiae sunt: in statu stat senex,
ut adoriatur moechum, qui formast ferox,
qui omnis se amare credit, quaeque aspexerit
mulier: eum oderunt qua viri qua mulieres.
nunc in tumultum ibo: intus clamorem audio. —