# Cento 583-627

Proba, Cento, Lines 583-627. Latin.

Canonical: https://interlinea.aeterna-institute.org/library/latin/proba/cento/583
JSON: https://interlinea.aeterna-institute.org/api/v1/library/latin/proba/cento/583

Postquam prima quies epulis mensaeque remotae,
Ipse inter primos genitori instaurat honores,
Suspiciens caelum. tum facta silentia linguis.
Dat manibus fruges dulcesque a fontibus undas
Impleuitque mero pateram ritusque sacrorum
Edocet immiscetque preces ac talia fatur:
'Audite, o proceres,' ait 'et spes discite uestras.
Nemo ex hoc numero mihi non donatus abibit,
Promissisque patris uestra' inquit munera uobis
Certa manent, pueri, et palmam mouet ordine nemo.
Et lux cum primum terris se crastina reddet,
Vnus erit tantum(==TANTUM_) in me exitiumque meorum,
Dum paci medium se offert de corpore nostro.
Iamque dies, nisi fallor, adest. secludite curas.
Mecum erit iste labor, nec me sententia fallit:
Vnum pro multis dabitur caput.' haec ita fatus
Conticuit seramque dedit per membra quietem.
Oceanum interea surgens Aurora reliquit.
Iamque sacerdotes late loca questibus implent
Cum populo patribus ferturque per agmina murmur.
Quod genus hoc hominum, quaeue hunc tam barbara morem
Permittit patria? poenas cum sanguine poscunt
Vndique collecti et magno clamore secuntur
Insontem, saeuitque animis ignobile uulgus.
Sol medium caeli conscenderat igneus orbem,
Cum subito(==SUBITO_) acciri omnes, populusque patresque,
Exposcunt farique iubent, quo sanguine cretus
Quidue petat quidue ipse ferat. praeclara tuentis
Facta uiri mixtus dolor et stupor urguet inertis
(Nescia mens hominum), certantque illudere capto.
Tum uero raptis concurrunt undique telis.
Tollitur in caelum clamor cunctique repente
Corripuere sacram effigiem manibusque cruentis
Ingentem quercum decisis undique ramis
Constituunt spirisque ligant ingentibus ipsum,
Tendebantque manus pedibus per mutua nexis
(Triste ministerium), sequitur quos cetera pubes,
Ausi omnes immane nefas ausoque potiti.
Ille autem impauidus 'quo uincula nectitis?' inquit
'Tantane uos generis tenuit fiducia uestri?
Post mihi non simili poena commissa luetis.'
Talia perstabat memorans fixusque manebat.
Interea magno misceri murmure caelum
Incipit et rebus nox abstulit atra colorem
Impiaque aeternam timuerunt saecula noctem.

---

Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://www.mqdq.it/testo/testo/codice/PROBA%7Ccent%7C001.
