Latin
Lines 14.119-14.133
Prudentius, Liber Peristephanon 14.119-133
Not analysed yet
cingit coronis interea Deus
frontem duabus martyris innubae:
unam decemplex edita sexies
merces perenni lumine conficit,
centenus extat fructus in altera.
o virgo felix, o nova gloria,
caelestis arcis nobilis incola,
intende nostris conluvionibus
vultum gemello cum diademate,
cui posse soli cunctiparens dedit
castum vel ipsum reddere fornicem,
purgabor oris propitiabilis
fulgore, nostrum si iecur inpleas.
nil non pudicum est quod pia visere
dignaris almo vel pede tangere.