# Hymnus tabaci 10

Raphael Thorius, Hymnus tabaci, RAPHAE. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/10
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/10

Accelerant, renuuntque mori, venatque supremo
Sanguine manantes, animae spiracula claudunt.
Vtque propinquabant, altis se prodit opacum
Stipitibus nemus, & folijs spectabile vastis.
Euge! meis, clamat, cognatam vitibus herbam
Agnosco, munusque Deûm. sed plura volenti
Surda manus, latas tenero de caudice frondes
Carpit, & ignoto latrantia viscera succo
Demulcet; viridis stillat sub dentibus humor.
Non tamen oblatas Sileni provida virtus
Praecipiti vorat ore dapes, sed cautior usu
Haeret ab exemplo documenta abstemius optans.
Nec mora: quis patulis lateat sub frondibus error,
Eventus docuit: totis (mirabile) castris
Evomitur, caditurque velut cum gurgite pleno
Ingruit admissi miranda potentia Bacchi;
Volvitur in gyrum tellus, coelumque videtur
Nubibus adductis surgenti occurrere terrae:
Tum sopor obrepit, somnique in victa cupido
Germanam dubia praesagit imagine mortem;
Capripedes mediis diffusos stertere arenis
Cernere erat, disiecta solo defeßa furentum
Membra Mimallonidum devota jacere sepulero.
Mox ubi discusso longi languore veterni
Plenior ex adytis in singula membra recurrit
Spiritus, amissae redierunt corpore vires
Surgere tunc alacres, pedibusque insistere firmis,

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
