# Hymnus tabaci 13

Raphael Thorius, Hymnus tabaci, RAPHAE. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/13
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/13

Vt solet à noti foecundo flumine Bacchi
Serpere paulatim non intellecta voluptas.
Ora madent: non salsa sitis, non vexat acerba
Esuries, vomitusve: levi vertigine tantum
Crura vacillare, & supremam udescere frontem
Percipit, illaesus sed & haec vanescere gaudet.
Tum vacuus densa Paeti porrectus in umbra,
Omnigenum ut patuit faecunda scientia rerum,
Dulcibus absumit lentas sermonibus horas.
Explicat ingentes opulentae mentis acervos,
Ludenti & similis Naturae arcana recludit,
Implicitos memorat sphaeris caelestibus orbes,
Compagemque hominis, terrae & miracula pandit,
Addit & oraclis docti libamina fumi.
Fumantem sequitur circum diffusa juventus
Ipsa novis operata tubis, fumoque fragrantis
At rudis ore vomit naso reddenda patente
Nubila cum multa tussi lacrymisque jocosis,
Ridicula, appressis animam quae claudere labris
Nescit, perque cavas iterum depellere nares;
Docta sed exemplo grandaevum aequare magistrum
Efflando satagit, repletque vaporibus auras;
Dumque hilares animis laeta vitulantur. in herba,
Ecce venit fessis longum expectata ministris
Annona, & multo ferventia dolia vino.
Clamores geminant, versisque ad cantica cannis
Gaudia agunt, epulisque favent, multumque vocatis
lumentis, reducique senis gratantur Asello:

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
