# Hymnus tabaci 23

Raphael Thorius, Hymnus tabaci, LIBER SECVNDVS. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/23
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/23

Indigenis statuit dominos, nec morem tyranno
Optavit metui, metuit non ipse timentes;
Lenibus alloquijs, & majestate remißam
Partus amor populi, facilis clementia mores
Erudijt, glebamque jugo parere suasit.
Terra feris infamis erat, Lyncesque, lupique,
Tigres & celeres pardi, mistique Leones,
Impune insidias pecorique virisque parabant,
Tollere nec cladem intentis in mutua bella
Cura fuit, maior sed erat meliorque voluptas
Finitimos flammis vexare & caedibus agros,
Et coctos calidis hostes apponere mensis.
Non tulit immanem ingluviem, qui temperat aestus,
Sanguinis inque siti pacis suffundit amorem
Vastitiem lustrare cupit, regesque cruentos
Visere, & ingenuas crassis dare mentibus artes.
Assumit numero è magno, quos indolis esse
Sciverat urbanae, calicum sed largior usus
Vitaque liberior, nervisque inimica libido
Fecerat effaetos, at nobilis aura Tabaci
Compositusque labor, caelique nitentior haustus
Sensim reddiderat reparatis viribus aegros.
Amphoriam, Balanumque legit, comemque Neandrum,
Iucundos comites, totidem quibus addit amoena
Fronte viros, luscum Pelian, geniique sagacis
Idmona, caerulei ridendum tubere naji,
Pauperis & barbae metuentem scommata Trullum.

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
