# Hymnus tabaci 29

Raphael Thorius, Hymnus tabaci, LIBER SECVNDVS. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/29
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/29

Libertas miseris, pedibus quos fune ligatis
Aegrotos stabulis in foedo stramine vidi.
Annuit Haemathoens: solvuntur vincula claudis,
Prorepunt geminis nixi, sua quique gerentes
Ore mala, & lucem veriti tetigisse supremam,
Vultibus obscoenis laetâ ductantur in aulâ.
Non tenuit lacrymas vetulus Pater. Eia, sodales
Vivitè, ait, vitam meliori at ducite fato:
Nam licet, & dabitur: latet isto condita buxo
Vestra salus, modo sit servari certa voluntas.
Tu miserande Senex, muriam pro sanguine venis
Qui generas, cui crura labant luctante podagrâ,
Purpurei stillant, hebetesque arctantur ocelli,
Caecus eris, si spernis opem, sed ab arte medelam
Sufficiam: & tumidis albo suffimine buccis
In pileum nebulam inspirat, vultusque seniles
Protinus includit junctis ad tempora limbis.
Excipit ore senex mordentes lumina fumos,
Et patitur jussus spe consolante dolorem,
Exprimit imbrem oculis, videt acrius omnia circum,
Plenius admissa detersis luce fenestris.
Atque potest adeo salebrosa in nare Magistri
Eminus extantes oculo numerare pyropos:
Namque rogatus uti in naso quae cerneret, & quot
Diceret, ostendit digitos, &, fraga tot, inquit,
Aspicio in nostris nascuntur qualia sylvis.
flia concussit Vetulus, risere sodales.
Dignus es articulis sine nodo: age sugito, dixit,
Claude labrum, & laxis expira naribus auram:
Sugit, & expirat; sed porro injussus, ut antrum
In gyros volvi, & turbari ructibus alvum
Sensit, humi recubans confertim cruda remittit
Frusta, & multiplices, quas ante voraverat, offas.
En podagrae exitium: sic fonte revellitur ipso
Succus edax teneros rodens sine dentibus artus.
Hoc bis agas, quum luna latet, cumque orbe recrevit

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
