# Hymnus tabaci 41

Raphael Thorius, Hymnus tabaci, LIBER SECVNDVS. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/41
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/41

Si quando oppressus pulmo sublatus anhelat,
Deprimit, inque suas cogit descendere sedes
Ocyus, incumbens binûm quam centurionum
Pondus, & impositi densissima sarcina plumbi.
Porrò nulla seni, si vitea pocula demas.
Commodiora dedit mater bellaria tellus,
Seu servanda venit naturae annona fovendo
Humorem ingenitum, suavem fundendo vaporem
Arenti cerebro, pellendi aut sensibus hostes:
Namque aciem lippis acuit: cui stiria pendens
Nasum hebetat, reddit siccata nare sagacem,
Dissolvitque graves ventosa ex aure susurros,
In mentem, ut melius sapientum dicta recondat,
Colloquijsque diem morosaque taedia fallat.
Quod si quis damnosa luens delicta juventae,
Nocte erucem scapulis gestat, somnumque recusat,
Hic quoque solamen quaerat, requiemque labori;
Non tantum sopor in venas obrepet amicus,
Vnde dolor cedat, sed, ne nox longa putetur,
Somnia pulcra dabit, rerum & spectacula viva
Offeret ante oculos. non qualia monstra figurat
Torrida, bilis atrox, faba, lentes, caepa, faselus:
Allia, & altercum fatuum, manicumque solanum,
Si quis edit, medio in somno spectare putabit
Horrendas facies, confusaque saecla animantum,
Quae nec sunt, nec erunt, harpyas aequore nantes,
Aëre Centauros, fißâ tellure Draconum

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
