# Hymnus tabaci 58

Raphael Thorius, Hymnus tabaci, IN EIVSDEM. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/58
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/58

Mitte puer lusum in glacie, ne lubrica fallat
Area & averso vitreum caput intonet ictu
Cum natibus, referasque domum pendentia crura.
Ingere ligna foco, tremulis & vellera lumbis:
Marmoream Cererem, lapidosaque frusta Lyaei,
Atque humilem mensam splendenti appone camino.
Prima domet stomachum glacie domita ipsa frementem
Brassica, sed multo quae surgat succida lardo:
Delicias putres callosa volumina verris
Non moror; obtineant crassae sua silfia nares
Cretensi mergenda mero, rabidoque sinapi.
At potius frixis succidia juncta vitellis,
Et veniat pleno gallina juvencula ventre,
Non adiposa situ, sed pasta siligine sicca,
Quae numeret varios utero praegnante nepotes.
Mox fument patinis jejuno frigore pingues,
Nunc viles epulae, turdi, regalia quondam
Fercula, felici multum curata Lucullo:
Sed mihi res pretium rebus, non copia, ponit.
Heus ubi avis rostrata, sapit quae podice longe
Splendidius, quam vel cerebro, vel pectore? crusto
Excipe collapsos pendente liquamine lactes
O gula: quam docilis, quae mandere discis oletum!
Obsessa gravius quid in urbe suasit egestes?
Suadet frigus edax: brumali frigore fervent
Viscera, & immensae consumunt omnia noctes.
Tarde puer? nondumne suo resoluta liquori
Vina audis? & jam arripuit prope flamma lagenam Tantalea haec poena est, medios glaciata prope ignes Inter vina sitis; magna est patientia virtus. Facta, heu, vappa, merum penetrabile frigus, amici,

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
