# Hymnus tabaci 61

Raphael Thorius, Hymnus tabaci, IN EIVSDEM. Latin.

Canonical: https://interlinea.aeterna-institute.org/library/latin/raphael-thorius/hymnus-tabaci/61
JSON: https://interlinea.aeterna-institute.org/api/v1/library/latin/raphael-thorius/hymnus-tabaci/61

Vtque nives vitet, niveis se moenibus abdit,
Nunc ursos pascit, capto modo pascitur urso,
Mustelam aut prandet, vulpis vel terga ligurrit.
Gaudia neu tandem festis regalibus absint,
Sortibus electum glaciata in regna sodalem
Proclamant, gelidum quoties delibat lacchum.
Sic tenebris segnes durant, nivibusque sepulti
Expectant reducem Phoebum, fluctusque sonantes,
Vt patriam repetant rari, laribusque reportent
Dimidias aures, lapsique foramina nasi,
Praeteritos casus dicturi astante corona,
Castaneas sparso dum volvent igne crepantes,
Et tumidas jungent ad singula pocula dextras.
Quis peregre excurrat? tuto vix itur in urbe,
Per tegulas tanto vehemens furit Aeolus aestu.
Hem muri titubare, nisi titubo ipse, videntur.
Libate, ô Socij, & vino mulcete procellam:
Roribus irriguis perhibent mitescere ventos.
Nemo casam repetet, positis nisi turbinis alis.
Portentum est, quoties saxis pluit: in sua nemo
Fata ruet, medico coenam praebente, sed irae
Impatiens si quis properat, tantisper ad ignem
Assideat, dum Scriba venit vicinus, ut illo
Teste palam scribat, testamentumque sigillet.
Tunc abeat, sed ne per tela incedat inermis
Induat in victam hanc galeam, quae sorde rubenti
Incrustata novem è clavo per lustra pependit,

---

Raphael Thorius, Hymnus tabaci. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://wiki.uibk.ac.at/noscemus/Hymnus_tabaci.
