# Phoenissae 1.46-95

Seneca the Younger, Phoenissae, Lines 1.46-1.95. Latin.

Canonical: https://interlinea.aeterna-institute.org/library/latin/seneca-the-younger/phoenissae/1.46

Omitte poenas languidas longae morae,
Mortemque totam recipe. Quid segnis traho
Quod uiuo? nullum facere iam possum scelus -
Possum miser! praedico, discede a patre;
Discede, uirgo: timeo post matrem omnia.
Antigone Vis nulla, genitor, a tuo nostram manum
Corpore resoluet: nemo me comitem tibi
Eripiet unquam. Labdaci claram domum,
Opulenta ferro regna germani petant;
Pars summa magni patris e regno mea est
Pater ipse: non hunc auferet frater mihi,
Thebana rapto sceptra qui regno tenet;
Non hunc cateruas alter Argolicas agens.
Non si reuulso Iupiter mundo tonet,
Mediumque nostros fulmen in nexus cadat,
Manum hanc remittam: prohibeas, genitor, licet,
Regam abnuentem; dirigam inuiti gradum.
In plana tendis? uado: praerupta appetis?
Non obsto, sed praecedo: quouis utere
Duce me; duobus omnis eligitur uia
Perire sine me non potes; mecum potes.
Hic alta rupes arduo surgit iugo,
Spectatque longe spatia subiecti maris.
Vis hanc petamus? Nudus hic pendet silex;
Hic scissa tellus faucibus ruptis hiat:
Vis hanc petamus? Hic rapax torrens cadit,
Partesque lapsi montis exesas rotat;
In hunc ruamus. Dum prior, quo uis, eo.
Non deprecor, non hortor. Exstingui cupis,
Votumque, genitor, maximum mors est tibi?
Si moreris, antecedo: si uiuis, sequor.
Sed flecte mentem; pectus antiquum aduoca,
Victasque magno robore aerumnas doma.
Resiste: tantis in malis uinci malum est.
Oedipus Unde in nefanda specimen egregium domo?
Unde ista generi uirgo dissimilis suo?
Fortuna, credis? aliquis est ex me pius?
Non esset umquam, fata benenoui mea,
Nisi ut noceret. Ipsa se in leges nouas
Natura uertet, regeret in fontem citas
Reuolutus undas amnis, et noctem afferet
Phoebea lampas, Hesperus faciet diem.
Ut ad miserias aliquid accedat meas,
Pii quoque erimus. Unica Oedipodae est salus,
Non esse saluum. Liceat ulcisci patrem
Adhuc inultum. Dextra quid cessas iners
Exigere poenas? quidquid exactum est adhuc,
Matri dedisti. Mitte genitoris manum,
Animosa uirgo: funus extendis meum,
Longasque uiui ducis exsequias patris.

---

Seneca, Phoenissae. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/sen/sen.phoen.shtml.