Latin · ~2 min · Dactylic hexameter
Lines 6.934-6.946
Statius, Thebais 6.934-946
Not analysed yet
Quis fluere occultis rerum neget omina causis?
fata patent homini, piget inservare, peritque
venturi praemissa fides: sic omina casum
fecimus, et vires hausit Fortuna nocendi.
Campum emensa brevi fatalis ab arbore tacta,
horrendum visu, per quas modo fugerat auras,
venit harundo retro versumque a fine tenorem
pertulit, et notae iuxta ruit ora pharetrae.
multa duces errore serunt: hi nubila et altos
occurrisse notos, adversi roboris ictu
tela repulsa alii. penitus latet exitus ingens
monstratumque nefa s: uni remeabile bellum
et tristes domino spondebat harundo recursus.