# Relationes 36

Symmachus, Relationes, XXXVI (XXXXVIIII. LVI) a. 384–385.. Latin.

Canonical: https://interlinea.aeterna-institute.org/library/latin/symmachus/relationes/36
JSON: https://interlinea.aeterna-institute.org/api/v1/library/latin/symmachus/relationes/36

Dies noctesque sollicitor, ut prompto obsequio divinae clementiae vestrae iussa promoveam; siquidem non licet longa conperendinatione differri iustitiae ac legibus amica decreta, ddd. imppp. unde cauto opus est, ne existimationem meam per alios adlata praeceptis tarditas devenustet. nam cum de Macedonio secus de re publica merito itemque Ammiano dudum mihi iudicium perennitas vestra legaverit, Ammianum quidem protectorum adtestatione cognovi, cum urbis vicina contingeret, languore consumptum ; de Macedonio varia iactantur, quem iam pridem debuit custodum sollicitudo perducere. quaeso igitur mansuetudinem vestram, ne mihi fraudi sit mora alieno studio aut torpore contracta, simulque deprecor, ut venerabilis aeternitas vestra singulatim quaerenda distinguat, si forte designatum reum cognitioni meae prosequentium cura tradiderit.

---

Symmachus, Relationes. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000794.zip.
