# Relationes 38

Symmachus, Relationes, XXXVIII (LI. LVIII) a. 384–385.. Latin.

Canonical: https://interlinea.aeterna-institute.org/library/latin/symmachus/relationes/38
JSON: https://interlinea.aeterna-institute.org/api/v1/library/latin/symmachus/relationes/38

In negotiis tempore ac iudicatione finitis cessare aequum est longae orationis excursum , ne et numinis vestri salutares actus oneret sermo prolixior et sine argumento rerum loquacitas morosa displiceat, ddd. imppp. cum in iudicio moderatoris Apuli inter Marcellum, qui se deiectum possessione questus est, itemque Venantium stratorem , ut ipse confirmat, eiusque germanam Batrachiam causa violentiae disceptaretur, provocatio a reis inconsulta processit, quod provincialis cognitor promissis litteris ad vicariam potestatem susceptum retineret examen. tunc auditorii sacri iudex rectoris adfatu super appellatione consultus et praeiudicialem multam statuit a provocatoribus inferendam et ipsum quaesitorem crimini dedit cum executione vindictae. post haec obreptionibus partium nonnulla gesta sunt, ut iudicatio consummata traheretur. nam et vir spectabilis decessor meus, cum multam didicisset exactam, quam decreto sacri auditorii appellatio praeiudicialis agnoverat, statuit causam criminis ad se debere transferri, et ego idem secutus partes in examen accivi. sed cum et tempus reparationis esset emensum, et poenam provocationis aut expectaret aut sumpsisset aerarium, violentiae quoque causam Venantii ac Batrachiae professio ac quorundam capitalis damnatio terminasset, pronuntiavi cognitionem sacri cessare iudicii et Venantium, quem v. c. et inlustris officiorum magister iusserat exhiberi, censui agenti in rebus Decentio, quo prosequente venerat, esse reddendum. sed cum Venantii stratoris inlicitam usurpatamque militiam Marcellus argueret. quod decurionum adscriptus albo, ut gesta docuerunt, adversum leges ad palatina castra transisset, non debui obiecta reticere, ut in ea re, quae modum mei egrediebatur examinis, aeternitas vestra ipsis legibus, quas tuetur, augustior iudicaret.

---

Symmachus, Relationes. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000794.zip.
