Latin
XXXXIIII (LVIII. LXV) a. 384–385.
Symmachus, Relationes 44
Not analysed yet
Cum mancipes salinarum magno ex numero ad paucos redacti necessitatis publicae molem ferre non possent, delata supplicatione meruerunt, ut his. . . . . . qui ante secreti atque excusati fuerant, redderentur et ex aliis corporibus seu vacantibus iusta supplementa incunctanter acciperent, ddd. imppp. allegata igitur praeceptione divina, cum plerosque consortio suo ante secretos muniri Macedonii suffragio repperissent, relationem super eorum muniminibus impetrarunt. vestrae tantum clementiae liberum est inique elicita rescripta rescindere. tunc urgente defectu navicularios aeque lignorum obnoxios functioni ad parem sollicitudinem vocare coeperunt, ut utriusque corporis cura coniuncta indiscretum munus agnosceret. at illi nonnullos de turmalibus suis tradere maluerunt quam in societatem tanti oneris convenire. itaque factum est, ut volentibus iisdem certi homines mancipibus iungerentur. nunc perennitatis vestrae stabilem censionem publica causa deposcit, ne obreptivis supplicationibus subsidia integrati corporis subruantur. relationi gesta coniunxi tam de iis habita, quos Macedonii interventus absolverat, quam me disceptante confecta, quibus sine vexatione cuiusquam voluntas naviculariorum nonnullos mancipibus deputavit. erit iam sacrosancti numinis vestri et illorum antiquare suffragia, quos ostenditur ambitus liberasse, et his obstruere aditum supplicandi, quos sui corporis adiudicavit adsensus.