# Andria 4.3

Terence, Andria, Act 4. Latin.

Canonical: https://interlinea.aeterna-institute.org/library/latin/terence/andria/4.3

Nihilne esse proprium cuiquam? Di vestram fidem:
Summum bonum esse herae putavi hunc Pamphilum,
Amicum, amatorem, virum in quovis loco
Paratum: verum ex eo nunc misera quem capit
Dolorem! facile hic plus mali est, quam illic boni.
Sed Davus exit. Mi homo quid istuc obsecro est?
Quo portas puerum?
Mysis nunc opus est tua
Mihi ad hanc rem exprompta memoria atque astutia.
Quidnam incepturus?
Accipe a me hunc ocius,
Atque ante nostram ianuam appone.
Obsecro
Humine?
Ex ara hinc sume verbenas tibi
Atque eas substerne.
Quamobrem id tute non facis?
Quia si forte opus sit ad herum iurandum mihi
Non apposuisse ut liquido possim.
Intelligo:
Nova nunc religio in te istaec incessit cedo?
Move ocius te, ut quid agam porro intelligas.
Pro Iupiter.
Quid est?
Sponsae pater intervenit.
Repudio quod consilium primum intenderam.
Nescio quid narres.
Ego quoque hinc ab dextera
Venire me assimulabo: tu ut subservias
Orationi ut quomque opus sit verbis vide.
Ego quid agas nihil intelligo: sed si quid est
Quod mea opera opus sit vobis, aut tu plus vides,
Manebo, ne quod vestrum remorer commodum.

---

Terence, Andria, ed. Edward St. John Parry. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0134/phi001/phi0134.phi001.perseus-lat2.xml.