# Andria 4.5

Terence, Andria, Act 4. Latin.

Canonical: https://interlinea.aeterna-institute.org/library/latin/terence/andria/4.5

In hac habitasse platea dictum est Chrysidem
Quae sese inhoneste optavit parere hic divitias
Potius quam in patria honeste pauper viveret.
Eius morte ea ad me lege redierunt bona.
Sed quos perconter video. Salvete.
Obsecro
Quem video? Estne hic Crito sobrinus Chrysidis?
Is est.
O Mysis, salve.
Salvus sis Crito.
Itan Chrysis? hem.
Nos quidem pol miseras perdidit.
Quid vos? quo pacto hic? satin recte?
Nosne? Sic
Ut quimus aiunt, quando ut volumus non licet.
Quid Glycerium? iam hic suos parentes repperit?
Utinam.
An nondum etiam? Haud auspicato huc me appuli:
Nam pol si id scissem nunquam huc tetulissem pedem:
Semper enim dicta est eius haec atque habita est soror:
Quae illius fuerunt possidet: nunc me hospitem
Lites sequi quam id mihi sit facile atque utile
Aliorum exempla commonent: simul arbitror
Iam aliquem esse amicum et defensorem ei; nam fere
Grandiuscula iam profecta est illinc. Clamitent
Me sycophantam, hereditates persequi,
Mendicum: tum ipsam despoliare non licet.
O optime hospes pol Crito antiquum obtines.
Duc me ad eam, quando huc veni, ut videam.
Maxime.
Sequar hos: nolo me in tempore hoc videat senex.

---

Terence, Andria, ed. Edward St. John Parry. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0134/phi001/phi0134.phi001.perseus-lat2.xml.