# Phormio 1.4.208b-230b

Terence, Phormio, Act 1, lines 1.4.208b-1.4.230b. Latin.

Canonical: https://interlinea.aeterna-institute.org/library/latin/terence/phormio/1.4.208b

Hoc nihil est, Phaedria: ilicet.
Quid hic conterimus operam frustra? Quin abeo?
Et quidem ego.
Obsecro:
Quid si assimulo? satin est?
Garris.
Vultum contemplamini: hem,
Satin sic est?
Non.
Quid si sic?
Propemodum.
Quid si sic?
Sat est.
Hem, istuc serva; et verbum verbo, par pari ut respondeas,
Ne te iratus suis saevidicis dictis protelet.
Scio.
Vi coactum te esse invitum, lege, iudicio: tenes?
Sed quis hic est senex quem video in ultima platea?
Ipsus est:
Non possum adesse.
Ah, quid agis? quo abis, Antipho?
Mane, inquam.
Egomet me novi et peccatum meumr:
Vobis commendo Phanium et vitam meam.
Geta, quid nunc fiet?
Tu iam lites audies:
Ego plectar pendens, nisi quid me fefellerit.
Sed quod modo hic nos Antiphonem monuimus
Id nosmet ipsos facere oportet, Phaedria.
Aufer mihi oportet: quin tu quod faciam impera.
Meministine olim ut fuerit vestra oratio
In re incipienda ad defendendam noxiam;
Iustam illam causam, facilem, vincibilem, optimam?
Memini.
Hem, nunc ipsa est opus ea, aut, si quid potest,
Meliore et callidiore.
Eiet sedulo.
Nunc prior adito tu: ego in subsidiis hic ero
Succenturiatus, si quid deficias.
Age.

---

Terence, Phormio, ed. Edward St. John Parry. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://github.com/PerseusDL/canonical-latinLit/blob/master/data/phi0134/phi004/phi0134.phi004.perseus-lat2.xml.