Latin
Apollinaris Sidonius, CARMINA, lines 1.10.13.1-1.10.13.55
Testamentum Porcelli, Apollinaris Sidonius 1.10.13.1-55
Not analysed yet
CARMEN XIII
AD IMPERATOREM MAIORIANVM.
Amphitryoniaden perhibet veneranda vetustas,
dum relevat terras, promeruisse polos.
sed licet in nuda torvus confregerit ulna
ille Cleonaeae guttura rauca ferae,
et quamquam ardenti gladio vix straverit hydram,
cum duplices pareret vulnere mors animas,
captivumque ferens silva ex Erymanthide monstrum
exarmata feri riserit ora suis,
collaque flammigenae disrumpens fumida furis
tandem directas iusserit ire boves,
taurus, cerva, Gigas, hospes, luctator, Amazon,
Thraex, canis, Hesperides sint monimenta viri,
nulla tamen fuso prior est Geryone pugna,
uni tergeminum cui tulit ille caput.
haec quondam Alcides; at tu Tirynthius alter,
sed princeps, magni maxima cura dei,
quem draco, cervus, aper paribus sensere sagittis,
cum dens, cum virus, cum fuga nil valuit,
Geryonen nos esse puta monstrumque tributum;
hinc capita, ut vivam, tu mihi tolle tria.
Has supplex famulus preces dicavit
responsum opperiens pium ac salubre.
ut reddas patriam simulque vitam
Lugdunum exonerans suis ruinis,
hoc te Sidonius tuus precatur:
sic te Sidonio recocta fuco
multos purpura vestiat per annos;
sic lustro imperii perennis acto
quinquennalia fascibus dicentur;
sic ripae duplicis tumore fracto
detonsus Vachalim bibat Sigamber.
quod si contuleris tuo poetae,
mandem perpetuis legenda fastis
quaecumque egregiis geris triumphis.
nam nunc Musa loquax tacet tributo,
quae pro Virgilio Terentioque
sextantes legit unciasque fisci,
Marsyaeque timet manum ac rudentem,
qui Phoebi ex odio vetustiore
nunc suspendia vatibus minatur.
CARMEN XIV
SIDONIUS POLEMIO SUO SALUTEM.
1. Dum post profectionem tuam, mi Polemi, frater amantissime, mecum granditer
reputo, quatinus in votis tuis philosophi fescennina cantarem, obrepsit materia, qua
decursa facile dinosci valet magis me doctrinae quam causae tuae habuisse rationem.
omissa itaque epithalamii teneritudine per asperrimas philosophiae et salebrosissimas
regiones stilum traxi; quarum talis ordo est, ut sine plurimis novis verbis, quae praefata
pace reliquorum eloquentum specialiter tibi et Complatonicis tuis nota sunt, nugae
ipsae non valuerint expediri. 2. videris, utrum aures quorundam per imperitiam temere
mentionem centri, proportionis, diastematum, climatum vel myrarum epithalamio con
ducibilem non putent. illud certe consulari viro vere Magno, quaestorio viro Domnulo,
spectabili viro Leone ducibus audacter affirmo, musicam et astrologiam, quae sunt
infra arithmeticam consequentia membra philosophiae, nullatenus posse sine hisce
nominibus indicari; quae si quispiam ut Graeca, sicut sunt, et peregrina verba con