Latin
Apollinaris Sidonius, CARMINA, lines 1.10.23.495-1.10.23.512
Testamentum Porcelli, Apollinaris Sidonius 1.10.23.495-512
Not analysed yet
hinc ad balnea, non Neroniana
nec quae Agrippa dedit vel ille cuius
bustum Dalmaticae vident Salonae,
ad thermas tamen ire, sed libebat
privato bene praebitas pudori.
post quas nos tua pocula et tuarum
Musarum medius torus tenebat,
quales nec statuas imaginesque
aere aut marmoribus coloribusque
Mentor, Praxiteles, Scopas dederunt,
quantas nec Polycletus ipse finxit
nec fit Fidiaco figura caelo.
Sed iam te veniam loquacitati
quingenti hendecasyllabi precantur.
tantum, etsi placeat, poema longum est.
iam iam sufficit, ipse et impediris
multum in carmine perlegens amicum,
dormitantibus otiosiorem.