# Apollinaris Sidonius 1.10.3.272-319 Testamentum Porcelli, Apollinaris Sidonius, Apollinaris Sidonius, CARMINA, lines 1.10.3.272-1.10.3.319. Latin. Canonical: https://interlinea.aeterna-institute.org/library/latin/testamentum-porcelli/apollinaris-sidonius/1.10.3.272 blanditias uni, ferro tamen iste petatur. quid loquor incassum? nihil est, quod tanta cavemus? ut regnet, victurus erit?' commotus in iras Aetius sic pauca refert: 'compesce furentis impia vota animi: mortem mandare valebo insontis, taceam nostri? quisquamne precatur, ut sine criminibus crimen fiat bene nasci? ad poenam quis fata vocet? tua viscera ferro, Maioriane, petam, Phoebus si nocte refulget, luna die, duplex ponto si plaustra novatur Parrhasis, Atlantem Tanais, si Bagrada cernit Caucason, Hercynii nemoris si stipite lintris texta Nabataeum pro Rheno sulcat Hydaspen, si bibit Hispanus Gangem tepidisque ab Erythris ad Tartesiacum venit Indus aquator Hiberum, si se Pollucis perfundit sanguine Castor, Thesea Pirithoi, Pyladen si stravit Orestae vel furibunda manus, raperet cum Taurica sacra matricida pius. sed ne sprevisse dolorem forte tuum videar, vivat careatque parumper militia. heu potuit nobis, nisi triste putasses, fortunam debere suam.' sic fatur et illum rure iubet patrio suetos mutare labores, fatorum currente rota, quo disceret agri quid possessorem maneat, quos denique mores ius civile paret, ne solam militis artem ferret ad imperium. suspenderat ilicet arma emeritus iuvenis, sterilis ieiunia terrae vomere fecundans. sic quondam consule curvo vertebas campos, paulum si pace sequestra classica laxasses, fortis eui laeva regebat stivam post aquilas, humili dum iuncta camino victoris fumum biberet palmata bubulci. Principis interea gladio lacrimabile fatum clauserat Aetius; cuius quo tutius ille magna Palatinis coniungeret agmina turmis, evocat hunc precibus; sed non se poena moratur sanguinis effusi (numerum collegerat ergo, non animum populi); ferri mala crimina ferro solvit et in vestram plus concidit ille ruinam. iam tunc imperium praesentis principis aurea volvebant bona fata colu; sed publica damna invidiam fugere viri. quicumque fuerunt nomen in Augustum lecti, tenuere relictum Caesaribus solium: postquam tu capta laboras, hic quod habet fecit. Traianum Nerva vocavit, cum pignus iam victor erat; Germanicus esset ut titulis, meritis fuerat. res ordine currit; --- Testamentum Porcelli, Apollinaris Sidonius. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea. License: Used with permission (https://www.thelatinlibrary.com/about.html). Source: https://www.thelatinlibrary.com/testamentum.html.