# Tibulli Aliorumque Carminum Libri Tres 1.2.1-42

Tibullus, Tibulli Aliorumque Carminum Libri Tres, Book 1, lines 1.2.1-1.2.42. Latin.

Canonical: https://interlinea.aeterna-institute.org/library/latin/tibullus/tibvlli-aliorvmque-carminvm-libri-tres/1.2.1

Adde merum vinoque novos conpesce dolores,
&nbsp Occupet ut fessi lumina victa sopor,
Neu quisquam multo percussum tempora baccho
&nbsp Excitet, infelix dum requiescit amor.
Nam posita est nostrae custodia saeva puellae,
&nbsp Clauditur et dura ianua firma sera.
Ianua difficilis domini, te verberet imber,
&nbsp Te Iovis imperio fulmina missa petant.
Ianua, iam pateas uni mihi, victa querelis,
&nbsp Neu furtim verso cardine aperta sones.
Et mala siqua tibi dixit dementia nostra,
&nbsp Ignoscas: capiti sint precor illa meo.
Te meminisse decet, quae plurima voce peregi
&nbsp Supplice, cum posti florida serta darem.
Tu quoque ne timide custodes, Delia, falle,
&nbsp Audendum est: fortes adiuvat ipsa Venus.
Illa favet, seu quis iuvenis nova limina temptat,
&nbsp Seu reserat fixo dente puella fores;
Illa docet molli furtim derepere lecto,
&nbsp Illa pedem nullo ponere posse sono,
Illa viro coram nutus conferre loquaces
&nbsp Blandaque conpositis abdere verba notis.
Nec docet hoc omnes, sed quos nec inertia tardat
&nbsp Nec vetat obscura surgere nocte timor.
En ego cum tenebris tota vagor anxius urbe,
&nbsp * * *
Nec sinit occurrat quisquam, qui corpora ferro
&nbsp Volneret aut rapta praemia veste petat.
Quisquis amore tenetur, eat tutusque sacerque
&nbsp Qualibet: insidias non timuisse decet.
Non mihi pigra nocent hibernae frigora noctis,
&nbsp Non mihi, cum multa decidit imber aqua.
Non labor hic laedit, reseret modo Delia postes
&nbsp Et vocet ad digiti me taciturna sonum.
Parcite luminibus, seu vir seu femina fiat
&nbsp Obvia: celari volt sua furta Venus.
Neu strepitu terrete pedum neu quaerite nomen
&nbsp Neu prope fulgenti lumina ferte face.
Siquis et inprudens adspexerit, occulat ille
&nbsp Perque deos omnes se meminisse neget:
Nam fuerit quicumque loquax, is sanguine natam,
&nbsp Is Venerem e rapido sentiet esse mari.

---

Tibullus, TIBVLLI ALIORVMQUE CARMINVM LIBRI TRES. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/tib.html.