# Tibulli Aliorumque Carminum Libri Tres 1.2.83-100

Tibullus, Tibulli Aliorumque Carminum Libri Tres, Book 1, lines 1.2.83-1.2.100. Latin.

Canonical: https://interlinea.aeterna-institute.org/library/latin/tibullus/tibvlli-aliorvmque-carminvm-libri-tres/1.2.83

Num feror incestus sedes adiisse deorum
&nbsp Sertaque de sanctis deripuisse focis?
Non ego, si merui, dubitem procumbere templis
&nbsp Et dare sacratis oscula liminibus,
Non ego tellurem genibus perrepere supplex
&nbsp Et miserum sancto tundere poste caput.
At tu, qui laetus rides mala nostra, caveto
&nbsp Mox tibi: non uni saeviet usque deus.
Vidi ego, qui iuvenum miseros lusisset amores,
&nbsp Post Veneris vinclis subdere colla senem
Et sibi blanditias tremula conponere voce
&nbsp Et manibus canas fingere velle comas,
Stare nec ante fores puduit caraeve puellae
&nbsp Ancillam medio detinuisse foro.
Hunc puer, hunc iuvenis turba circumterit arta,
&nbsp Despuit in molles et sibi quisque sinus.
At mihi parce, Venus: semper tibi dedita servit
&nbsp Mens mea: quid messes uris acerba tuas?

---

Tibullus, TIBVLLI ALIORVMQUE CARMINVM LIBRI TRES. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/tib.html.