# Tibulli Aliorumque Carminum Libri Tres 1.3.1-44

Tibullus, Tibulli Aliorumque Carminum Libri Tres, Book 1, lines 1.3.1-1.3.44. Latin.

Canonical: https://interlinea.aeterna-institute.org/library/latin/tibullus/tibvlli-aliorvmque-carminvm-libri-tres/1.3.1

Ibitis Aegaeas sine me, Messalla, per undas,
&nbsp O utinam memores ipse cohorsque mei.
Me tenet ignotis aegrum Phaeacia terris,
&nbsp Abstineas avidas, Mors, modo, nigra, manus.
Abstineas, Mors atra, precor: non hic mihi mater
&nbsp Quae legat in maestos ossa perusta sinus,
Non soror, Assyrios cineri quae dedat odores
&nbsp Et fleat effusis ante sepulcra comis,
Delia non usquam; quae me cum mitteret urbe,
&nbsp Dicitur ante omnes consuluisse deos.
Illa sacras pueri sortes ter sustulit: illi
&nbsp Rettulit e trinis omina certa puer.
Cuncta dabant reditus: tamen est deterrita numquam,
&nbsp Quin fleret nostras respiceretque vias.
Ipse ego solator, cum iam mandata dedissem,
&nbsp Quaerebam tardas anxius usque moras.
Aut ego sum causatus aves aut omina dira,
&nbsp Saturni sacram me tenuisse diem.
O quotiens ingressus iter mihi tristia dixi
&nbsp Offensum in porta signa dedisse pedem!
Audeat invito ne quis discedere Amore,
&nbsp Aut sciat egressum se prohibente deo.
Quid tua nunc Isis mihi, Delia, quid mihi prosunt
&nbsp Illa tua totiens aera repulsa manu,
Quidve, pie dum sacra colis, pureque lavari
&nbsp Te—memini—et puro secubuisse toro?
Nunc, dea, nunc succurre mihi—nam posse mederi
&nbsp Picta docet templis multa tabella tuis—,
Ut mea votivas persolvens Delia voces
&nbsp Ante sacras lino tecta fores sedeat
Bisque die resoluta comas tibi dicere laudes
&nbsp Insignis turba debeat in Pharia.
At mihi contingat patrios celebrare Penates
&nbsp Reddereque antiquo menstrua tura Lari.
Quam bene Saturno vivebant rege, priusquam
&nbsp Tellus in longas est patefacta vias!
Nondum caeruleas pinus contempserat undas,
&nbsp Effusum ventis praebueratque sinum,
Nec vagus ignotis repetens conpendia terris
&nbsp Presserat externa navita merce ratem.
Illo non validus subiit iuga tempore taurus,
&nbsp Non domito frenos ore momordit equus,
Non domus ulla fores habuit, non fixus in agris,
&nbsp Qui regeret certis finibus arva, lapis.

---

Tibullus, TIBVLLI ALIORVMQUE CARMINVM LIBRI TRES. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/tib.html.