# Tibulli Aliorumque Carminum Libri Tres 1.3.45-88

Tibullus, Tibulli Aliorumque Carminum Libri Tres, Book 1, lines 1.3.45-1.3.88. Latin.

Canonical: https://interlinea.aeterna-institute.org/library/latin/tibullus/tibvlli-aliorvmque-carminvm-libri-tres/1.3.45

Ipsae mella dabant quercus, ultroque ferebant
&nbsp Obvia securis ubera lactis oves.
Non acies, non ira fuit, non bella, nec ensem
&nbsp Inmiti saevus duxerat arte faber.
Nunc Iove sub domino caedes et vulnera semper,
&nbsp Nunc mare, nunc leti mille repente viae.
Parce, pater. timidum non me periuria terrent,
&nbsp Non dicta in sanctos inpia verba deos.
Quodsi fatales iam nunc explevimus annos,
&nbsp Fac lapis inscriptis stet super ossa notis:
'Hic iacet inmiti consumptus morte Tibullus,
&nbsp Messallam terra dum sequiturque mari.'
Sed me, quod facilis tenero sum semper Amori,
&nbsp Ipsa Venus campos ducet in Elysios.
Hic choreae cantusque vigent, passimque vagantes
&nbsp Dulce sonant tenui gutture carmen aves,
Fert casiam non culta seges, totosque per agros
&nbsp Floret odoratis terra benigna rosis;
Ac iuvenum series teneris inmixta puellis
&nbsp Ludit, et adsidue proelia miscet Amor.
Illic est, cuicumque rapax mors venit amanti,
&nbsp Et gerit insigni myrtea serta coma.
At scelerata iacet sedes in nocte profunda
&nbsp Abdita, quam circum flumina nigra sonant:
Tisiphoneque inpexa feros pro crinibus angues
&nbsp Saevit, et huc illuc inpia turba fugit.
Tum niger in porta serpentum Cerberus ore
&nbsp Stridet et aeratas excubat ante fores.
Illic Iunonem temptare Ixionis ausi
&nbsp Versantur celeri noxia membra rota,
Porrectusque novem Tityos per iugera terrae
&nbsp Adsiduas atro viscere pascit aves.
Tantalus est illic, et circum stagna, sed acrem
&nbsp Iam iam poturi deserit unda sitim,
Et Danai proles, Veneris quod numina laesit,
&nbsp In cava Lethaeas dolia portat aquas.
Illic sit, quicumque meos violavit amores,
&nbsp Optavit lentas et mihi militias.
At tu casta precor maneas, sanctique pudoris
&nbsp Adsideat custos sedula semper anus.
Haec tibi fabellas referat positaque lucerna
&nbsp Deducat plena stamina longa colu,
At circa gravibus pensis adfixa puella
&nbsp Paulatim somno fessa remittat opus.

---

Tibullus, TIBVLLI ALIORVMQUE CARMINVM LIBRI TRES. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/tib.html.