# Tibulli Aliorumque Carminum Libri Tres 3.13

Tibullus, Tibulli Aliorumque Carminum Libri Tres, Poem 3.13. Latin.

Canonical: https://interlinea.aeterna-institute.org/library/latin/tibullus/tibvlli-aliorvmque-carminvm-libri-tres/3.13

Tandem uenit amor, qualem texisse pudori
quam nudasse alicui sit mihi fama magis.
Exorata meis illum Cytherea Camenis
attulit in nostrum deposuitque sinum.
Exsoluit promissa Venus: mea gaudia narret,
dicetur si quis non habuisse sua.
Non ego signatis quicquam mandare tabellis,
ne legat id nemo quam meus ante, uelim,
sed peccasse iuuat, uultus componere famae
taedet: cum digno digna fuisse ferar.

---

Tibullus, TIBVLLI ALIORVMQUE CARMINVM LIBRI TRES. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/tib.html.