# Liber Octavus 1.349-391 Valerius Flaccus, Liber Octavus, Lines 1.349-1.391. Latin. Canonical: https://interlinea.aeterna-institute.org/library/latin/valerius-flaccus/liber-octavus/1.349 vos modo vel solum hoc, fluctus, expellite corpus: non te, Aeeta pater, generi aut, Sol magne, pudebit. fallor, an hos nobis magico nunc carmine ventos ipsa movet diraque levat maria ardua lingua atque iterum Aesonides, iterum defenditur arte qua solet? haud illi cantus et futile murmur proderit. ite, rates, et frangite virginis undam!' dixit et intortis socio cum milite remis prosilit. at fluctu puppis labefacta reverso solvitur effunditque viros ipsumque minantem tunc quoque et elata quaerentem litora dextra. ibat et arma ferens et strictum naufragus ensem incipit et remos et quaerere transtra solutae sparsa ratis maestas altis intendere voces puppibus. ast inter tantos succurrere fluctus nulla potest aut ille sequi quotiensque propinquat tunc alius rursus dirimit mare. iam tamen errat iamque abiit fundoque iterum violentus ab imo erigitur, sed fluctus adest magnoque sub altis turbine figit aquis et tandem virgine cessit. Absyrtus visu maeret defixus acerbo: heu quid agat? qua vi portus et prima capessat ostia, qua possit Minyas invadere clausos, quos videt agnoscitque fremens? maria obvia contra saevaque pugnat hiems totusque in vertice pontus. abscessit tandem vanaque recedit ab ira et tanta de clade ratis. latus inde sinistrum adversamque procul Peuces defertur in oram cum sociis, gemino nam scinditur insula flexu Danuvii. hac dudum Minyas Pagasaea puppis in statione manent, illinc Aeetius heros obsidet adversa tentoria Thessala classe impatiens pugnaeque datur non ulla potestas. noctes atque dies vastis mare fluctibus inter perfurit, expediant donec Iunonia sese consilia atque aliquem bello ferat anxia finem. At Minyae tanti reputantes ultima belli urgent et precibus cuncti fremituque fatigant Aesoniden: quid se externa pro virgine clausos obiciat quidve illa pati discrimina cogat? respiceret pluresque animas maioraque fata tot comitum, qui non furiis nec amore nefando per freta, sed sola sese virtute sequantur. --- Valerius Flaccus, Liber Octavus. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea. License: Used with permission (https://www.thelatinlibrary.com/about.html). Source: https://www.thelatinlibrary.com/valeriusflaccus8.html.