# Liber Quintus 1.1-43 Valerius Flaccus, Liber Quintus, Lines 1.1-1.43. Latin. Canonical: https://interlinea.aeterna-institute.org/library/latin/valerius-flaccus/liber-quintus/1.1 Altera lux haud laeta viris emersit Olympo: Argolicus morbis fatisque rapacibus Idmon labitur extremi sibi tum non inscius aevi. at memor Aesonides nimium iam vera locuti Phineos hinc alios rapto pavet Idmone luctus. tum comiti pia iusta tulit caelataque multa arte Dolionii donat velamina regis, hospes humum sedemque Lycus. flens arma revellit Idmonis e celsa Mopsus rate. robora caedunt pars silvis portantque arae, pars auguris alba fronde vittisque ligant positumque feretro congemuere; dies simul et suus admonet omnes. Ecce inter lacrimas interque extrema virorum munera, quem cursus penes imperiumque carinae, Tiphyn agit violenta lues cunctique pavore attoniti fundunt maestas ad sidera voces: 'arquipotens adverte, precor, nunc denique Apollo! hoc, pater, hoc nobis refove caput, ulla laboris si nostri te cura movet, qui cardine summo vertitur atque omnis manibus nunc pendet ab unis!' dicta dabant ventis nec debita fata movebant. qualem praecipiti gravidum iam sorte parentem natorum flet parva manus trepidique precantur duret ut invalidis et adhuc genitoris egenis, haud aliter socii supremo in tempore Tiphyn ante alios superesse volunt. mors frigida contra urget et ille recens oculis intervolat Idmon. exanimum frustra Minyae clamore morantur avellique negant: vix membra rigentia tandem imposuere rogo lacrimasque et munera flammis vana ferunt, crescit donis feralis acervus. ut vero amplexus fessi rupere supremos et rapidae sonuere faces, tunc ipsa cremari visa ratis medioque viros deponere ponto. non tulit Aesonius geminis flagrantia cernens corpora cara rogis, sed pectore ductor ab imo talia voce gemit: 'quid tantum infensa repente numina? quas nostri poenas meruere labores? bina (nefas) toto pariter mihi funera surgunt litore. magna adeo comitum numerosaque pubes? aut socios rapit atra dies aut ipse relinquo sontibus impulsus Furiis. ubi Tiphys? ubi Idmon fata canens? ubi monstriferae par ille novercae? --- Valerius Flaccus, Liber Quintus. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea. License: Used with permission (https://www.thelatinlibrary.com/about.html). Source: https://www.thelatinlibrary.com/valeriusflaccus5.html.