# Factorum et Dictorum Memorabilium Libri Novem 9.13.ext.2

Valerius Maximus, Factorum et Dictorum Memorabilium Libri Novem, Book 9. Latin.

Canonical: https://interlinea.aeterna-institute.org/library/latin/valerius-maximus/factorvm-et-dictorvm-memorabilivm-libri-novem/9.13.ext.2

Referam nunc eos, quibus aliquos suspectos habentibus exquisitior sui quaesita custodia est: nec a miserrimo, sed ab eo, qui inter paucos felicissimus fuisse creditur, incipiam. Masinissa rex parum fidei in pectoribus hominum reponens salutem suam custodia canum uallauit. quo tam late patens imperium? quo tantum liberorum numerum? quo denique tam arta beniuolentia constrictam Romanam amicitiam, si ad hanc tuendam nihil canino latratu ac morsu ualentius duxit?

---

Valerius Maximus, FACTORVM ET DICTORVM MEMORABILIVM LIBRI NOVEM. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.
License: Used with permission (https://www.thelatinlibrary.com/about.html). Source: https://www.thelatinlibrary.com/valmax.html.